Nyɔsoa a 'wlʋɛ nyʋ ‑sea' 'diikua' 'ble o
146
Ao 'bɛɛ‑ Nyɔsoa 'a 'nynɩ "i.'De 'ma pɛe ‑wee'‑ "klein 'ʋn ɛ,
'ma 'bɛɛ Nyɔsoa 'a 'nynɩ "i
2 ‑Ta 'ɩn nɩa 'kmʋ ke ɛ,
'ma muɛ Nyɔsoa 'a 'nynɩ "i 'bɛɛa'
'De 'ma 'kmʋnɩa' ‑wee'‑ "klein 'ʋn,
'ma mua dɩ blaa' 'ɩn 'je Nyɔsoa 'nynɩ ‑sa.
3 "Ikmaʋ ‑nɩa 'de 'blʋa ‑nɛ "kpei ‑ta,
ao 'bo ʋʋ tɔ' "i tbaa.
Dɛ ‑nʋɛ ʋʋ seɛ 'bɛɛ‑ ʋʋ 'je nyʋ 'pʋʋ‑
4 ‑Sɔntɩ ʋʋ 'mɛ ‑wɛe 'blʋ ku mu 'e
'blʋ 'ʋn de 'sʋ ɛ, dɩ ʋʋ ‑tea' ɩ ‑wee' 'wla "niɔ‑
5 Nyɔ ‑pɛan 'de Sakɔbʋ 'a Kea jai,
‑wɛe ‑ɔ ‑tea' Nyɔsoa Kea 'kwa ‑kwlɩ" ɛ,
‑mɔ 'dinmɔwɔn.
6 Ɛmɛ ‑nʋ' jaʋn‑,
‑ɛ nʋ 'blʋa, ‑ɛ nʋ 'tɔni,
ke dɩ 'klein ‑nɩa 'e jaʋndi', 'de 'blʋa "kpei ke 'de 'tɔniɛ ‑sɔn ɛ.
Ɛɛ' 'wlʋ wlu "kpei jeejee.
7 Ɛɛ 'wlʋɛ nyʋ ʋʋa ‑tua" 'kle o,
nyʋ 'mɩɩɛ nʋa ɛɛ "nyɩɛ ‑wi" ‑mʋ diidɛ,
nyʋ ‑ʋʋ ‑nɩa 'e ‑kaso 'di ɛ,
Nyɔsoa a seie ‑wi" ‑mʋ 'mɛ.
8 Nyʋ ‑ʋʋ ‑dɔa",
Nyɔsoa a 'bai ‑wi" ʋʋ "jri 'mɛ.
Nyʋ ‑ʋʋ ‑kooa" "kpei ‑wɛe ‑ʋʋa' na a,
ɛɛ "srɛɛ ‑wi" mʋ "i.
Nyʋ ‑ʋʋ ‑srɛai" ɛ, ɛ kma ‑wi" ‑mʋ 'a ‑tɩ'.
9 Nyɔsoa a siɛ 'dʋɩ ‑wi" "jriɛ o,
‑wɛe ɛɛ ‑te' ‑tɩɔn" nynʋkpae' o,
"kwienynuu‑ kwa wɛi.
'Kaa dɩ 'diwɔnyniʋn a ‑tea', ɛɛ 'wla ‑mɩ "niɔ‑.
10 Nyɔsoa nɩɛ 'beɔ 'de nɔ" 'oo nɔ" ‑wee'‑ 'di.
Ɛ nɩ ‑ma Kea ‑o, 'oo Selisalɛmʋ,
'de "ji 'a "ji ‑wee'‑ "klein 'di.
Ao 'bɛɛ‑ Nyɔsoa 'a 'nynɩ "i.